Tauākī Tūmataitinga Te Rito

He utauta a Te Rito mā ngā ākonga, tō rātou kura, ngā mātua me ngā whānau.  Ko te tikanga, ka āhei atu, ka taea hoki te whakamahi i ngā mōhiohio mātauranga a te ākonga, ki te wāhi kotahi.

Kei te āta whakaputaina a Te Rito.  Ko te āheinga tuatahi ki Te Rito, mā ngā tumuaki me ngā kaiako anake.  Kātahi ngā ākonga ka whai āheinga i te kuhunga o te kura ki My Ako, ā, mō muri iho ngā mātua me ngā whānau e whai āheinga ai.  E kōrero anō mō Te Rito kei konei.

Ngā kupu

Whakamahia ai ēnei kupu i roto i tēnei tauākī Matatapu:

• Mōhiohio whaiaro – ngā kōrero mō te tangata e mōhio ai tētahi atu ko wai ia.  Kaua ko tōna ingoa anake.  Tērā pea ko te nama waea, te wāhi noho, ngā tohu kēmu, ngā mōhiohio rānei mō ngā mahi ako me ngā āhuatanga noho.
• Ngā mōhiohio o Te Rito - ngā mōhiohio ka whakamahia, puritia, tiria rānei ki a Te Rito.
   

Ko te hunga ka whakamahi i a Te Rito ko:

• ngā tamariki kura
• ngā mātua me ngā whānau
• ngā tumuaki me ngā kaimahi kura.

He aha ngā mahi e āheitia ana ki Te Rito?

Ka taea e ngā ākonga kura te whakauru atu ki ō rātou ake mōhiohio me ngā karere ā-kura mā roto i a Te Rito.

Ka taea e ngā mātua me ngā whānau te whakauru atu ki ngā mōhiohio o ā rātou tamariki me ngā karere ā-kura mā roto i a Te Rito, i runga anō i te āhua o tō rātou hononga ki te tamaiti.

Ngā kura:

• Mā ngā tumuaki e whakatau:
  ­   - ko ētahi ngā taumahi me ngā mōhiohio ka whakamahia e te kura
  ­   - me pēhea te toha i ngā momo pūkete Te Rito ki ngā kaimahi, ngā ākonga me ngā mātua/whānau. 
•  Ka taea e ngā kaimahi kura te:
  ­ - whakauru ki ō rātou ake mōhiohio
  ­ - te whakauru me te whakahou i ngā mōhiohio o ētahi atu kaimahi me ngā ākonga, i runga anō i te tūranga i kopoua ki Te Rito.
   

Te Tāhuhu o te Mātauranga ('te Tāhuhu):

•  ko tāna he:
  ­    - whakarato i a Te Rito ki ngā kura
  ­    - tuku raraunga ki a Te Rito
  ­    - tautoko i ngā kaiwhakamahi o Te Rito
• he whakarite kia āta whakahaeretia e te kaiwhakarato te ratonga hei tiaki i te haumaru me te Matatapu
• ka whakamahi pea i ngā raraunga kei Te Rito ina whakaaetia, ina waeturetia
   

Te Kaitiaki Raraunga a Te Rito (he rōpū motuhake):

• ka arotake i te āhua o te whakamahi, o te tiri a Te Rito i ngā mōhiohio ākonga
  E wātea ana ētahi atu mōhiohio mō Te Rito Kaitiakitanga ki konei.

Ko tā te kaiwhakarato, a Edsby:

• he whakahaere i te ratonga o Te Rito, me te tiaki i te haumaru me te Matatapu
• he tuku tautoko ā-hangarau
• he whakahou i te ratonga

Ka whakawātea tomokanga a Te Rito ki ngā mōhiohio ā-mātauranga o te ākonga: 

• kei te wāhi kotahi
• āhei atu te(ngā) kura i te wā ka hūnuku kura te ākonga.

E tutuki ai tēnei, me pupuri, me whakamahi hoki a Te Rito i ngā mōhiohio whaiaro, otirā:

• me tika, me hou hoki ngā rekoata o ia ākonga
• ka whakarite kia āhei atu te hunga tika ki ngā mōhiohio.

Kia mōhio mai: Kua kohia kētia ēnei mōhiohio e ngā kura, ā, ka utaina e rātou ki Te Rito.
 

Ka taea e tēnei hunga te uta mōhiohio whaiaro ki Te Rito:

• te ākonga (ngā mātua rānei), ngā kaimahi kura rānei.

• ngā whakahoutanga aunoa ā-matihiko a:

  - te pūnaha whakahaere ākonga (SMS) a te kura

  - ētahi atu pūnaha a te Tāhuhu (pēnei i a ENROL) kia oti i te kura te whakauru raraunga ki taua pūnaha.

Anei ngā mōhiohio ka puritia, ka whakamahia hoki e Te Rito:

• te whakamahinga, me ngā kōrero haurongo o ngā kaiwhakamahi katoa
• ngā mōhiohio ākonga – pērā i ngā kōrero i runga, me ngā aromatawai, ngā whakaurunga, ngā tautoko me ngā kiko ako
• ngā kaimahi – ngā mōhiohio kaiwhakamahi katoa, me te tūranga o te kaiako.

He taipitopito kei te Tūtohi 1 mō Te Rito

Tūtohi 1: Ngā momo mōhiohio kei Te Rito

Ka kite ngā kaiwhakamahi katoa e hono ana ki te kura i:

• ngā pūrongo kōrero hapori kura
• ngā rōpū whānui kua whakaritea e te kura

Ka kite te ākonga i: 

• te nuinga o ngā mōhiohio mōna ake, me ngā hua aromatawai
• ngā karere ka tukua, ka whiwhi rānei te rōpū, ngā karere muna ki tētahi kaiako.
• āna mahi ako me ngā mōhiohio kua utaina e ia
• ngā mōhiohio mō āna akomanga.

Ka kite ngā mātua/whānau i:

• ngā mōhiohio o te tamaiti, me 

    - tana maramataka
­    - ngā karere kaiako
­    - te kōpaki ākonga (me ngā tākupu a tētahi atu kaitiaki/whānau)

• ngā kōrero hou a ngā kaiako kei ngā aromatawai o te tamaiti
• ngā mōhiohio whānui mō ngā akoranga tae atu ki ngā karere a te kaiako.

Ka kite hoki te tumuaki i:

• ngā mōhiohio katoa mō tana kura, ākonga, mātua, kaimahi me ngā akomanga
• ngā karere muna kua tohua e te tangata whiwhi hei karere 'kikino'.

Ka kite te kaiako i:

• ngā mōhiohio katoa mō ōna akomanga
• te nuinga o ngā mōhiohio o ā rātou ākonga, me ngā mōhiohio mātua/whānau
• ngā karere muna i waenga i a rātou ko ngā ākonga takitahi, mātua rānei.

Pūnaha

Ka whai a Edsby, te kaiwhakarato i a Te Rito, i ngā tikanga pai rawa mo te haumaru me te Matatapu, mā te whakamahi i ngā ratonga kapua a Microsoft.  Ka tirohia e Edsby me te Tāhuhu ngā tūraru haumaru me te Matatapu kei roto i a Te Rito.  Mā rāua e whakahaere ngā tūraru hei tiaki i ngā mōhiohio ka puritia, ka tiria hoki.

Ka whakamunatia ngā raraunga katoa ka tukua i waenga i a Te Rito me te kaiwhakamahi, tētahi atu pū raraunga rānei (pēnei i te SMS).

Ngā pūkete kaiwhakamahi

Ka taea anake e ngā kura te whakarite i āna pūkete kaimahi, ākonga, mātua/whānau.  Ka tukua ki ia kaiwhakamahi o Te Rito tētahi momo pūkete ka whakatau i ngā mōhiohio e āhei atu ai te kaiwhakamahi.

Ko ētahi tāngata ka whai āheinga ki ngā mōhiohio a ētahi atu ākonga o ētahi atu kura.  Hei tauira, ko te Kairuruku Tautoko Akoranga tērā.

Te tiri mōhiohio ki ngā rōpū kiritoru

E kore e tiria ngā mōhiohio a Te Rito ki tētahi rōpū kiritoru ki te kore e herea i raro i te ture.

Te whakatairanga me te hoko raraunga

E kore a Edsby me te Tāhuhu:

• e tuku whakatairanga ki tētahi kaiwhakamahi o Te Rito
• e hoko mōhiohio, raraunga me ngā kāhua kaiwhakamahi o Te Rito.

Ngā pihikete

He kōnae kuputuhi iti 'ngā pihikete' ka puritia ki tō pūtirotiro ina toro koe ki Te Rito. E kore ngā pihikete a Te Rito e kohi, e pupuri rānei i ngā mōhiohio whaiaro.

 

Me ū te kura ki te Ture Matatapu 2020 me āna Mātāpono Matatapu.  Ka uru ki tēnei ko te whakarite i te:

• tika o te kohi, te whakamahi me te tiri i ngā mōhiohio, e ai ki te ture
• tika o ngā mōhiohio
• haumaru o ngā mōhiohio, me te āhei anō o te hunga tika ki ngā kōrero.
   

Ka mahi tahi te Tāhuhu me te kaiwhakarato ki:

• te whakamātautau i te pai o te mahi a Te Rito, tae atu ki te tiaki i te pūnaha, kia noho tapu hoki ngā kōrero.
• te whakarite kia tutuki ngā paerewa haumaru, matatapu hoki, i ngā pūnaha ka hono atu ki Te Rito
• te whakahaere i ngā tūraru kua tautuhitia
• te tautuhi i ngā tauwhitiwhiti kino
• te tapitapi me te whakahou i te pūnaha
• te tuku tautoko ā-hangarau hei āwhina i te kura ki te urupare ki ngā tono mōhiohio i raro i te Privacy Act, te Official Information Act rānei.
   

Te Tāhuhu

He whāiti noa te āheinga o ngā kaimahi motuhake a te Tāhuhu e tuku ana i te tautoko ā-hāngarau, ki ngā mōhiohio kei Te Rito.

Ko te āheinga o ēnei kaimahi a te Tāhuhu:

• ka hua ake i te wā ka tono tētahi kura kia whakaratoa he tautoko ā-hangarau
• ka pā anake ki ngā kaimahi kua whakangungua ki ngā take matatapu, me ngā herenga hoki o tō rātou āheinga
• ka tātaritia

Ka tonoa pea ngā kaimahi a te Tāhuhu ki tētahi kura kia whai wāhi ki tētahi rōpū mahi tahi, ā, ka kite anake i ngā ingoa me ngā whakaahua o ngā mema.  E kore e whai āheinga ki ngā mōhiohio ākonga.

Ngā kura

Mā ngā kura e whakatau me pēhea te toha i ngā momo pūkete Te Rito ki:

• ngā kaimahi
• ngā mātua me ngā whānau.

Anei ngā tikanga ka whāia e ngā kura kia tika te āheinga ki ngā mōhiohio kei Te Rito:

• ka whakauru ngā kaimahi ki Te Rito mā Takiuru Rāngai Mātauranga (ESL)
• ka takiuru ngā ākonga ki Te Rito mā te ratonga o My Ako.

Te whiti ki kura kē

Ina whiti te ākonga ki kura kē atu:

• ka whai āheinga te kura hou ki ngā mōhiohio ākonga (tirohia te Tūtohi 1)
• ka whakakorehia aunoatia te āheinga o te kura o mua.

Anei ngā mōhiohio ka wātea ki te kura hou:

• ngā mōhiohio tautoko akoranga i tāpirihia i ngā tau e toru kua hipa
• ngā tuhipoka tauwhitiwhiti kaiako.

Neke atu i te kura kotahi o te ākonga

Ko ētahi ākonga ka haere ki ētahi kura e rua pea i te wā kotahi.  Ina pērā, ka āhei ngā kura ki ēnei kōrero o te ākonga:

• ingoa me te whakaahua kāhua
• ngā 'haurongo tāpiri' (tirohia te Tūtohi 1) me ngā mōhiohio hauora.

Ngā mema rōpū o tētahi atu kura

Ina whakarite te kura i tētahi rōpū, ā, ka tonoa ngā mema o ētahi atu kura, anei ngā mōhohio ka tiria:

• te ingoa o te mema me te whakaahua
• ngā karere i tukua ki te rōpū

Edsby 

He whāiti te āheinga o ngā kaimahi Edsby (te kaiwhakarato) ki ngā mōhiohio whaiaro kia pai ai te tautoko i te ratonga.  He āheinga hoki tōna ki te pūnaha kia pai ai te tautiaki. 

 

I raro i te Privacy Act 2020, ka taea e te hunga whai mōhiohio whaiaro ki Te Rito te:

• tono kape o ōna mōhiohio whaiaro
• tono kia whakatikaina ōna ake mōhiohio mēnā kei te hē.

Ka taea e ngā kura te whakapā atu ki Te Rito ki te rapu āwhina o te whai mōhiohio hei urupare i tētahi tono Privacy Act a te ākonga, a ngā mātua/whānau rānei.

Ngā ākonga kura

Ina whakauru te ākonga ki Te Rito, ka taea e ia te:

• kite i ōna ake mōhiohio mō te tau
• te kaweatu i ngā mahi kōpaki mō te tau.

Me tono te ākonga ki tō rātou kura ki te hiahia:

• tiro i ōna ake mōhiohio mai i ngā tau o mua
• panoni i ōna ake mōhiohio whaiaro

Mehemea kei te tauwhitiwhiti kura te ākonga, kua wehe rānei i te kura, ka taea e te ākonga te whakapā atu ki a Te Rito kia āwhinatia ia ki te whakauru ki ōna ake mōhiohio.

Ka taea e ngā mātua me ngā whānau te tono i ngā mōhiohio ākonga, kia panonihia rānei.
 

Kaimahi

Ka taea e ngā kaimahi te kite i ōna ake mōhiohio mā te:

1.  Takiuru ki Te Rito
2.  Kōwhiri i te 'Mōhiohio Whaiaro' i te pae kōwhiringa.

Ka taea te whakatikatika mōhioho mā te:

• panoni i ngā kōrero i roto i te pūnaha whakahaere ākonga, ā, 
• te panoni rānei i ngā kōrero i roto i Te Rito, ā, 
• te tono rānei ki tōna tumuaki kia panonihia.

Te pūranga, te puritanga me te mukunga

Ko ngā mōhiohio e pā ana ki te whai wāhi a te ākonga ki ngā akoranga:

• ka pūrangatia i te mutunga o ia tau - ka āhei te tumuaki me ngā kaiako ki te pūranga
• ka haumaru te muku i te pūranga ina 7 tau te tawhito.  Hāunga ngā mōhiohio kei te Rēhita Tautoko Akoranga, ka puritia mō te 3 tau.

Ka puritia te toenga o ngā mōhiohio ākonga ki Te Rito, atu ki te 7 tau i te wehenga o te ākonga i te kura.

Ka puritia hoki te pūruatanga o ngā mōhiohio katoa kei Te Rito mō te 7 tau anō.
 

Official Information Act

Ina whiwhi tono OIA te Tāhuhu mō ngā kōrero kei Te Rito, ka tukua te tono ki te kura māna e whakautu.

Whakahaere Wāwāhinga Matatapu

Ina kitea tētahi wāwāhinga matatapu tūturu, whakapae rānei ki Te Rito:

• Ko tā te Tāhuhu:
  -  he whāki wawe ki te kura
  ­-  he āwhina i te kura ki te whakahaere i te wāwāhinga
• Ko tā te kura
  ­ - he whāki wawe i te Tāhuhu
  ­ - he whakamārama i te kura ki ngā āhuatanga whakahaere i te wāwāhinga.